Descifrar e entender un ceo estrelado non é fácil. Si, todos coñecemos a alguén capaz de ver osas e carros, deuses e obxectos, pero a maioría apenas podemos trazar un par de liñas entre estrelas. Nisto a tecnoloxía pódenos botar unha man e pódenos abrir novos camiños para penetrarnos no espazo descoñecido.

Analizamos algunhas das moitas apps que existen para estudar o Universo. Todas elas son unha ferramenta moi enriquecedora e motivadora, para dar un paso máis aló das clásicas imaxes do Sistema Solar dos libros de texto. Animámosvos a probar esta forma de “enganchar” ao alumnado a través da curiosidade innata que todos temos por saber o que ocorre alí arriba .

Nasa App

Empezaremos polos que máis teñen que dicir nisto do espazo: a NASA. Sen dúbida, esta referencia é imprescindible para calquera profesor de sociais, xeografía, tecnoloxía, bioloxía... xa que sempre apostou pola educación e o seu labor didáctico é moi activa. Proba diso é que a súa aplicación ten todo tipo de recursos: vídeos, imaxes, explicacións, historias e acceso á propia televisión da NASA.

Sky Map

Esta aplicación permite, dunha forma sinxela, entender rapidamente o que ocorre alí arriba. Basta con enfocar co móbil ou a tablet ao ceo e empezarán a aparecer na pantalla constelacións, planetas e estrelas, todos eles identificados, para que os alumnos poidan esculcar libremente.

Solar Walk 2

Pero se o que queredes en clase é achegarvos de verdade ao espazo, ver como son os planetas e as estrelas, posiblemente esta sexa a vosa opción. Os alumnos poderán facer zoom e ver en que se diferencian os planetas ou entender como se move o Sistema Solar. As animacións, infografías e información coas que o presenta son dunha gran calidade.

Solar Walk Lite

O Sistema Solar en 3D, un soño para calquera alumno. Unha simulación que permite viaxar polo espazo e esculcar o Universo co grao de detalle que queira cada un. E non só planetas senón tamén estacións espaciais! Ademais é posible fixar unha data concreta e ver o aspecto do ceo nese momento. É unha ferramenta moi motivadora para o alumnado.

Start Chat

Esta é unha das apps de exploración/explicación do espazo máis utilizada no mundo. Utiliza tamén o GPS do teléfono e mostra o ceo en relación ao momento onde nos atopamos. Quizais o máis rechamante para os estudantes é que, para entender as constelacións, superpóñense debuxos moi elaborados e evocadores.

A lista de apps dedicadas a explicar os misterios do Universo é moi longa e seguro que nos deixamos algunha moi interesante. O importante é que alumnos e profesores poidan elixir a que máis se adecúe ás súas necesidades e inquietudes e gocen xuntos da viaxe interestelar.