As competencias son un compoñente do currículo que aparece por primeira vez no ano 2006 coa aprobación da Lei Orgánica de Educación. Na actualidade, a nova  Lei Orgánica para a Mellora da Calidads Educativa define as competencias como as capacidades para aplicar de forma integrada os contidos propios de cada ensino e etapa educativa, co fin de lograr a realización adecuada de actividades e a resolución eficaz de problemas complexos.

No currículo básico da Educación Primaria, que acaba de aprobarse recentemente, sinálase que son 7 as competencias que forman parte do currículo: Comunicación lingüística, Competencia matemática e competencias básicas en ciencia e tecnoloxía, Competencia dixital, Aprender a aprender, Competencias sociais e cívicas, Sentido de iniciativa e espírito emprendedor e Conciencia e expresións culturais.

Para que se poidan adquirir eficazmente as competencias deben cumprirse unha serie de requisitos:

• Que estean integradas de maneira efectiva no currículo.
• Que se deseñen actividades de aprendizaxe integradoras.
• Que nas aprendizaxes se combínen tanto habilidades prácticas, coñecementos, motivación, valores éticos, actitudes e emocións.
• Que se mobilicen conxuntamente os elementos anteriores para lograr unha acción eficaz.
• Que as tarefas educativas permitan ao alumnado avanzar cara aos resultados de aprendizaxe de máis dunha competencia ao mesmo tempo.
• Que as aprendizaxes se poidan aplicar a unha diversidade de contextos académicos, sociais e profesionais.

Para avaliar este novo elemento do currículo é necesario que o alumnado poida mobilizar todos eses coñecementos e habilidades que posúe. Na rede, podemos atopar algúns recursos específicos que permiten a avaliación de competencias, como as Cazas do tesouro, as Miniquest e especialmente as WebQuest.

No ano 1995 Bernie Dodge, profesor de tecnoloxía educativa da Universidade de San Diego, crea a WebQuest, que é unha actividade de investigación na que a información coa que interactúan o alumnado provén total ou parcialmente de recursos da internet.

O feito de que as WQ estean vinculadas aos recursos que se poden localizar na rede provocou a aparición de diferentes servizos que ofrecen modelos xa realizados ou instrumentos para o deseño das túas propias WQ, por exemplo 1, 2, 3, tu webquest e Web Creator 2.

Os pasos que debes seguir para deseñar unha WQ son os seguintes:

1. Escribe unha introdución que centre a temática do traballo.
2. Realiza unha descrición da tarefa que lle vas a pedir ao alumnado.
3. Explica o proceso que é necesario seguir para levala a cabo.
4. Selecciona unha listaxe de recursos apropiados para facela.
5. Indica de maneira clara como a vas a avaliar.
6. Sinala unha conclusión que resuma tarefa a elaborar.